ചെമ്മനത്ത് ശ്രീകൃഷ്ണസ്വാമി ക്ഷേത്രത്തിലെ കർക്കിടക വാവുബലി തർപ്പണം: തയ്യാറെടുപ്പുകൾ പൂർത്തിയായി

ചെമ്മനത്തുകര: പരശുരാമനാൽ പ്രതിഷ്ഠിതമായ ചെമ്മനത്ത് ശ്രീകൃഷ്ണ ക്ഷേത്രത്തിൽ കർക്കിടക വാവുബലി തർപ്പണത്തിനുള്ള ഒരുക്കങ്ങൾ പൂർത്തിയായി. 1173 നമ്പർ എൻ.എസ്.എസ് കരയോഗത്തിൻ്റെ ഉടമസ്ഥതയിലുള്ള ക്ഷേത്രത്തിൽ, കർക്കിടക വാവു ദിവസമായ 12 ന് പുലർച്ചെ 4:30 മുതൽ ബലിതർപ്പണ ചടങ്ങുകൾ ആരംഭിക്കും.

ക്ഷേത്രത്തിന് മുന്നിലുള്ള കുളത്തിലാണ് ഭക്തജനങ്ങൾക്കായി ബലിതർപ്പണ സൗകര്യങ്ങൾ ഒരുക്കിയിരിക്കുന്നത്. ശംഖ്, ചക്ര, ഗദാധാരിയായി ചതുർബാഹുവായി കുടികൊള്ളുന്ന ഭഗവാന് പ്രത്യേക വഴിപാടുകളും പൂജകളും അന്നേദിവസം ഉണ്ടായിരിക്കുന്നതാണ്. തർപ്പണത്തിൽ പങ്കെടുക്കുന്ന ഭക്തജനങ്ങൾക്ക് ആവശ്യമായ സൗകര്യങ്ങൾ ക്ഷേത്രക്കമ്മിറ്റി ഉറപ്പാക്കിയിട്ടുണ്ട്.

കർക്കിടക വാവിന്റെ ഐതീഹ്യം

ദക്ഷിണായന കാലഘട്ടത്തിന്റെ തുടക്കത്തിലാണ് കർക്കിടക വാവ് അഥവാ കർക്കിടക അമാവാസി വരുന്നത്. ഈ സമയത്ത് പിതൃക്കൾ പിതൃലോകത്തുനിന്ന് ഭൂമിയിലേക്ക് വരുമെന്നും, അവരുടെ ആത്മാക്കളുടെ ശാന്തിക്കായി പിൻതലമുറക്കാർ ചെയ്യുന്ന ബലിതർപ്പണം അവർ സന്തോഷത്തോടെ സ്വീകരിക്കുമെന്നുമാണ് ഹൈന്ദവ വിശ്വാസം. തിലതർപ്പണം നടത്തുകയും ചെയ്യുന്ന സന്തതികൾക്ക് പിതൃക്കളുടെ അനുഗ്രഹും, ശാസ്ത്രവിധിയനുസരിച്ച് ഈ ദിവസം നടത്തുന്ന പിതൃതർപ്പണം ആത്മാക്കൾക്ക് മോക്ഷം നൽകുമെന്നും, കുടുംബത്തിൽ സമാധാനവും ഐശ്വര്യവും കൊണ്ടുവരുമെന്നുമാണ് ഐതീഹ്യം.