പത്മശ്രീ ചെറുവയൽ രാമൻ അന്തരിച്ചു; വിടപറഞ്ഞത് പാരമ്പര്യ നെൽവിത്തുകളുടെ കാവലാൾ

കൽപറ്റ: പത്മശ്രീ ജേതാവും പാരമ്പര്യ നെൽവിത്ത് സംരക്ഷകനുമായ ചെറുവയൽ രാമൻ (74) അന്തരിച്ചു. വയനാട് മാനന്തവാടി കമ്മന സ്വദേശിയാണ്. പരമ്പരാഗത നെൽവിനങ്ങളുടെ സംരക്ഷണത്തിലൂടെ ദേശീയതലത്തിൽ ശ്രദ്ധേയനായിരുന്നു അദ്ദേഹം.

നാടൻ നെൽവിത്തുകളെ സംരക്ഷിക്കുന്നതിൽ ജീവിതം ഉഴിഞ്ഞുവെച്ച ചെറുവയൽ രാമൻ, അൻപതോളം വരുന്ന അപൂർവ്വവും പാരമ്പര്യവുമായ നെൽവിത്തുകളാണ് തന്റെ കൈവശം നിലനിർത്തി പോന്നത്. കൃഷിയെയും പ്രകൃതിയെയും നെഞ്ചോട് ചേർത്തുപിടിച്ച അദ്ദേഹത്തിന്റെ സേവനങ്ങളെ മാനിച്ച് 2023-ൽ രാജ്യം പത്മശ്രീ നൽകി ആദരിച്ചിരുന്നു.

ചെറുവയൽ കുറിച്യത്തറവാട്ടിലെ കേളപ്പന്റെയും തേയിയുടെയും മകനായി 1952 ലാണു ജനനം. പ്രതികൂല സാഹചര്യങ്ങൾ ഉയർന്ന വിദ്യാഭ്യാസത്തിനു തടസ്സമായെങ്കിലും ജീവിതാനുഭവങ്ങളിലൂടെ വലിയ അറിവുകൾ സ്വന്തമാക്കി. പരിസ്ഥിതിയുടെയും നെൽക്കൃഷിയുടെയുമെല്ലാം പ്രാധാന്യം തിരിച്ചറിഞ്ഞ രാമൻ ബ്രസീലിലെ ലോക കാർഷിക സെമിനാറിലടക്കം ഇന്ത്യയുടെ ശബ്ദമായി. കുന്നുംകുളമ്പൻ, പെരുവക, കുങ്കുമശാലി, കുത്തിച്ചീര, കുഞ്ഞുഞ്ഞി, ഓണമൊട്ടൻ, ഓണച്ചണ്ണ, വെള്ളിമുത്ത്, കനകം, ചെമ്പകം തുടങ്ങിയ വിത്തുകളുടെ സംരക്ഷകനുമാണു രാമൻ.