കുടുംബശ്രീ പ്രവർത്തകർ ദുരിതാശ്വാസ ക്യാമ്പിലേക്ക് ഭക്ഷണ സാധനങ്ങൾ നൽകി

തലയോലപ്പറമ്പ്: പ്രകൃതി ദുരന്തത്തെ തുടർന്ന് എ.ജെ. ജോൺ സ്‌കൂളിൽ പ്രവർത്തിക്കുന്ന ദുരിതാശ്വാസ ക്യാമ്പിലേക്ക് ഭക്ഷണസാധനങ്ങൾ എത്തിച്ച് തലയോലപ്പറമ്പ് ഗ്രാമപഞ്ചായത്ത് കുടുംബശ്രീ സി.ഡി.എസ് പ്രവർത്തകർ.
50 കിലോ കപ്പ, ബ്രെഡ്, ബിസ്‌കറ്റ് തുടങ്ങിയ അവശ്യ ഭക്ഷണ സാധനങ്ങളാണ് ക്യാമ്പിൽ എത്തിച്ചു നൽകിയത്. സി.ഡി.എസ് ചെയർപേഴ്‌സൺ പ്രിയ പ്രദീപിന്റെ നേതൃത്വത്തിൽ എത്തിയ കുടുംബശ്രീ പ്രവർത്തകരിൽ നിന്നും കടുത്തുരുത്തി ബ്ലോക്ക് പഞ്ചായത്ത് അംഗം സീതു ശശിധരൻ ഭക്ഷണസാധനങ്ങൾ ഏറ്റുവാങ്ങി. ഭക്ഷണസാധനങ്ങൾ നൽകുന്നതിനൊപ്പം ദുരിതാശ്വാസ ക്യാമ്പിലെ അംഗങ്ങളോടൊപ്പം പാട്ടുകൾ പാടിയും വിശേഷങ്ങൾ പങ്കുവെച്ചും സന്തോഷം പകരാനും കുടുംബശ്രീ പ്രവർത്തകർ സമയം കണ്ടെത്തി. മാനസികമായ ആശ്വാസം കൂടി പകർന്നുനൽകിയ പ്രവർത്തനം ക്യാമ്പിലെ അന്തേവാസികൾക്ക് ഏറെ ആശ്വാസമായി. ചടങ്ങിൽ സി.ഡി.എസ് വൈസ് ചെയർപേഴ്‌സൺ ഷീല ദിലീപ്, സി.ഡി.എസ് അംഗങ്ങളായ ആനീസ്, രേവതി, സുശീല, അക്കൗണ്ടന്റ് ജയ എന്നിവരും പങ്കെടുത്തു.