വൈക്കം കലാശക്തിയിൽ കഥകളി ചൊല്ലിയാട്ടത്തിന് സമാപനമായി

വൈക്കം: വൈക്കം കലാശക്തിയിൽ ദ്വാദശ സംവത്സരാഘോഷത്തോട് അനുബന്ധിച്ച് രണ്ട് ദിവസങ്ങളിലായി നടന്ന കഥകളി ചൊല്ലിയാട്ടത്തിന് സമാപനമായി. കലാമണ്ഡലം ശ്രീകുമാർ ആശാൻ്റെ മേൽനോട്ടത്തിലായിരുന്നു ചൊല്ലിയാടിയത്. കലാശക്തിയിലെ വിദ്യാർത്ഥികളടക്കമുള്ളവരാണ് ചൊല്ലിയാട്ടത്തിൽ പങ്കെടുത്തത്.

നളചരിതം രണ്ടാം ദിവസത്തിലെ അടന്ത 56 അക്ഷര കാലത്തിലുള്ള കുവലയവിലോചനേ ചെമ്പട 32 അക്ഷരകാലത്തിലുള്ള ദയിതേ കേൾ തുടങ്ങിയ പദങ്ങളും കല്യാണ സൗഗന്ധികം ശൗര്യഗുണം, പരിതാപിക്കരുതേ തുടങ്ങിയ ചിട്ടപ്രധാന പദങ്ങളും സുഭദ്രാഹരണം കൃഷ്ണൻ, ബാലിവിജയം ബാലി കൂടാതെ തോടയം, ചുറപ്പാട്, പകുതിപ്പുറപ്പാട് എന്നിവയാണ് ചൊല്ലിയാടിയത്. ചൊല്ലിയാട്ടം കാണാൻ നിരവധി ആസ്വാദകരും എത്തിയിരുന്നു. വൈക്കം കലാശക്തിയുടെ സാധകം എന്ന യുട്യൂബ് ചാനലിനും തുടക്കം കുറിച്ചു.