ശ്രദ്ധേയമായി എറണാകുളം ജില്ലാ കളക്ടർ ജി. പ്രിയങ്കയുടെ 'കോൺഷ്യസ് കൺസ്യൂമറിസം'

കൊച്ചി: എന്തെല്ലാം വേണം എന്തൊക്കെ വാങ്ങണം എന്നറിയാതെ ആഡംബരങ്ങളുടെയും അത്യാധുനിക ഫാഷന്റെയും പിന്നാലെ പായുന്ന പുതുതലമുറയ്ക്ക് സ്വന്തം ജീവിതശൈലിയിലൂടെ വലിയൊരു പരിസ്ഥിതി സന്ദേശം നൽകുകയാണ് എറണാകുളം ജില്ലാ കളക്ടർ ജി. പ്രിയങ്ക. വടക്കൻ പറവൂരിൽ നടന്ന പരിസ്ഥിതി ദിനാഘോഷ ചടങ്ങിൽ സംസാരിക്കവെ, താൻ പിന്തുടരുന്ന തികച്ചും ലളിതമായ വസ്ത്രധാരണ രീതിയെക്കുറിച്ച് കളക്ടർ തുറന്നുപറഞ്ഞത് ഇപ്പോൾ സമൂഹമാധ്യമങ്ങളിൽ വലിയ ചർച്ചയായിരിക്കുകയാണ്.

​കേവലം എട്ട് പാന്റുകളും പതിനഞ്ച് ഷർട്ടുകളും മൂന്ന് ജോടി ചെരുപ്പുകളും മാത്രമാണ് തന്റെ വാർഡ്രോബിലുള്ളതെന്ന് കളക്ടർ വെളിപ്പെടുത്തി. ഇവ മാറിമാറി ധരിച്ചാണ് താൻ ഔദ്യോഗിക പരിപാടികളിൽ ഉൾപ്പെടെ പങ്കെടുക്കുന്നത്. വിപണിയിലെ പുതിയ ട്രെൻഡുകൾക്ക് പുറകെ പോകാതെ, അത്യാവശ്യത്തിന് മാത്രം സാധനങ്ങൾ വാങ്ങി ഉപയോഗിക്കുന്ന 'കോൺഷ്യസ് കൺസ്യൂമറിസം' (ബോധപൂർവമുള്ള ഉപഭോഗം) എന്ന രീതിയാണ് താൻ ശീലമാക്കിയതെന്നും പ്രിയങ്ക വ്യക്തമാക്കി.

​നമ്മുടെ കുട്ടിക്കാലത്ത് വർഷത്തിൽ ഒന്നോ രണ്ടോ തവണ മാത്രമാണ് പുതിയ വസ്ത്രങ്ങൾ വാങ്ങിയിരുന്നതെന്നും ഹോട്ടൽ ഭക്ഷണം വല്ലപ്പോഴുമുള്ള ഒരു ആഡംബരമായിരുന്നുവെന്നും കളക്ടർ ഓർമ്മിപ്പിച്ചു. ഇന്ന് സാമ്പത്തിക ശേഷി ഉയർന്നതോടെ വസ്ത്രങ്ങൾ വാങ്ങിക്കൂട്ടുന്നതും ആഴ്ച തോറും പുറത്തുനിന്ന് ഭക്ഷണം കഴിക്കുന്നതും പതിവായി മാറി. എന്നാൽ ഈ അമിത ഉപഭോഗം സുസ്ഥിര വികസനത്തിന് വലിയൊരു ഭീഷണിയാണ് ഉയർത്തുന്നത്.

ഓരോ പരിപാടിക്കും പുതിയ വസ്ത്രങ്ങളും ചെരുപ്പുകളും വാങ്ങി, ഒന്നോ രണ്ടോ തവണ മാത്രം ഉപയോഗിച്ച് അവ വലിച്ചെറിയുന്ന ശീലം പ്രകൃതിയെ ദോഷകരമായി ബാധിക്കും. പണമുണ്ടെന്ന് കരുതിയോ മറ്റുള്ളവരെ കാണിക്കാനോ വേണ്ടി സാധനങ്ങൾ വാങ്ങിക്കൂട്ടേണ്ടതില്ല. വ്യക്തികളുടെ പുറംമോടിയോ വിലകൂടിയ വസ്ത്രങ്ങളോ അല്ല, മറിച്ച് അവരുടെ സ്വഭാവമാണ് അവരെന്ന മനുഷ്യനെ നിർവചിക്കുന്നത്. പുതിയ കാര്യങ്ങൾ വാങ്ങരുതെന്നല്ല ഇതിനർത്ഥം, മറിച്ച് 365 ദിവസവും പരിസ്ഥിതിയെക്കൂടി പരിഗണിച്ചുകൊണ്ടുള്ള ഒരു ജീവിതശൈലി നമ്മൾ ശീലമാക്കണമെന്നാണ് കളക്ടർ ഓർമ്മിപ്പിക്കുന്നത്. പ്രകൃതിയെ സംരക്ഷിക്കാൻ വലിയ കാര്യങ്ങൾ ചെയ്യുന്നതിനൊപ്പം, വ്യക്തിജീവിതത്തിൽ വരുത്തുന്ന ഇത്തരം ചെറിയ നിയന്ത്രണങ്ങൾക്കും വലിയ മാറ്റങ്ങൾ സൃഷ്ടിക്കാൻ സാധിക്കുമെന്ന സന്ദേശമാണ് കളക്ടറുടെ വാക്കുകൾ നൽകുന്നത്.